O‘zDJTU talabalari universitetning zamonaviy Axborot-resurs markazi faoliyati bilan tanishdi

Insoniyat tarixida yaratilgan eng buyuk va betakror kashfiyotlardan biri, shubhasiz, kitobdir. U shunchaki qog'oz va siyohdan iborat sahifalar to'plami emas, balki zamon va makon chegaralarini buzib o'tuvchi sehrli ko'prikdir. Qadimiy bitiklardan tortib zamonaviy nashrlargacha bo'lgan har bir asar o'quvchi uchun mutlaqo yangi bir olam eshigini ochadi. Kitob orqali biz asrlar qa'ridagi allomalarning hikmatlaridan bahramand bo'lamiz, olis qit'alarga xayolan sayohat qilamiz va boshqa insonlarning qismatini o'zimiznikidek his qilamiz.Bugungi shiddatli axborot asrida, har soniyada minglab ma'lumotlar oqimi ongimizga bostirib kirayotgan bir davrda kitobning jamiyat hayotidagi o'rni haqida jiddiyroq o'ylashga majburmiz. Ijtimoiy tarmoqlar, qisqa xabarlar va yengil-yelpi kontentlarga o'ralashib qolgan zamonaviy inson uchun kitob mutolaasi shunchaki ermak yoki bo'sh vaqtni o'tkazish vositasi emas, balki ma'naviy qashshoqlashuvdan asrab qoluvchi eng ishonchli qalqondir.Ana shunday teran anglash va yuksak ma'naviy ehtiyojning amaliy ifodasi sifatida kuni kecha  O‘zbekiston davlat jahon tillari universitetining (O‘zDJTU)  barcha fakultetlari 1-kurs talabalari Axborot-resurs markaziga uyushtirgan maxsus tashrifini e'tirof etish joiz. Bu shunchaki kutubxonaga qilingan sayohat emas, balki kelajak egalarining o'z ustida ishlash, tafakkur ufqlarini kengaytirish yo'lidagi muhim amaliy qadami bo'ldi.Universitetning Axborot-resurs markaziga qadam qo'ygan har bir inson o'zini bilimlarning qaynoq o'chog'iga tushib qolgandek his qiladi. Ushbu maskan qator kitob javonlari-yu jimjit zallardan iborat an'anaviy kutubxona tushunchasidan ancha yiroq bo'lib, o'zida zamonaviylik, qulaylik va innovatsion yechimlarni mujassam etgan ulkan ma'rifat saroyiga aylangan. Tashrif davomida talabalar bu yerda kitobxonlar uchun yaratilgan mukammal shart-sharoitlar bilan yaqindan tanishdilar.Eng avvalo, e'tiborni tortadigan jihat — bu yerdagi boy va rang-barang kitob fondidir. Universitet yo'nalishidan kelib chiqib, jahon adabiyoti durdonalari, o'nlab xorijiy tillarni o'rganishga ixtisoslashgan eng so'nggi darsliklar, ilmiy-ommabop nashrlar, shuningdek, dunyoning nufuzli nashriyotlari (Oksford, Kembrij va h.k.) tomonidan chop etilgan nodir adabiyotlar talabalar ixtiyorida.Shu bilan birga, zamonaviy o'quvchi uchun nafaqat bosma, balki elektron manbalar ham suv va havodek zarur ekanligi markaz faoliyatida to'la o'z aksini topgan. Axborot-resurs markazi yuqori tezlikdagi uzluksiz internet (Wi-Fi) bilan to'liq ta'minlangan bo'lib, o'nlab zamonaviy kompyuter xonalari orqali xalqaro ilmiy bazalar, yirik elektron kutubxonalar jumladan lib.uzswlu.uz va UNILIBRARY.UZ raqamlashtirilgan arxivlarga to'g'ridan-to'g'ri ulanish imkoniyatlarini tanishtirish maqsadida seminar dars mashg'ulotlari tashkil qilindi. Kitoblarni izlash va ulardan foydalanishning elektron kataloglashtirilgan tizimi mutolaa jarayonini yanada osonlashtiradi.O'quv zallari haqida gap ketganda, dizayn va ergonomikaga alohida yondashilganini ko'rish mumkin. Yorug' va shinam, mo'tadil iqlimni saqlaydigan  mutolaa uchun ideal muhitni taqdim etadi. Yakka tartibda, chuqur diqqatni jamlab o'rganishni xohlovchilar uchun osoyishta burchaklar tashkil etilgan bo'lsa, jamoaviy loyihalar va qizg'in bahs-munozaralar olib borishni maqsad qilgan guruhlar uchun maxsus munozara xonalari (Discussion room) ajratilgan. Bunday o'ylangan muhit boshqalarga xalaqit bermagan holda erkin fikr almashishga xizmat qiladi.

Xulosa o'rnida aytish mumkinki, O‘zDJTU Axborot-resurs markaziga uyushtirilgan bu tashrif talabalar qalbida ilmga bo'lgan ishtiyoqni yanada alangalantirdi. Zamon qanchalik shiddat bilan o'zgarmasin, qanday yangi texnologiyalar hayotimizga kirib kelmasin, aynan shunday barcha sharoitlarga ega, ham an'anaviy, ham raqamli kitobxonlikni o'zida birlashtirgan ma'rifat maskanlari yoshlarimizni yorug' kelajak sari yetaklovchi mayoq bo'lib qolaveradi.
https://t.me/uzlibuz/6643 ushbu havola orqali talabalar tashrifi chog'ida olingan fotosuratlarni ko'rishingiz mumkin.