“Central Asia - 2021” XIV Xalqaro konferensiyasi hamda "Kitob va mutolaa - jamiyat taraqqiyotining strategik resursi" mavzusidagi Xalqaro forum ochilishi bo'lib o'tmoqda

2021-yil 19-may kuni Yoshlar ijodiyot saroyida “Central Asia – 2021: Fan, ta'lim, madaniyat va biznesda internet va axborot kutubxona resurslari” XIV Xalqaro konferensiyasi hamda MDHga a'zo davlatlar Gumanitar hamkorlik bo‘yicha davlatlararo jamg‘armasining "Kitob va mutolaa jamiyat taraqqiyotining strategik resursi sifatida" forumining tantanali ochilish marosimi bo‘lib o‘tdi.
O‘zbekiston Respublikasi Prezidenti Administratsiyasi huzuridagi axborot va ommaviy kommunikasiyalar agentligi direktori Asadjon Xodjaev anjuman ishtirokchilarini qutlar ekan, uning sohaga yangi yondoshuvlar, yangi tajriba almashinuviga sabab bo‘lishini, bu esa o‘z o‘rnida xorijiy hamkasblarga milliy tajribamizni taqdim etishimiz imkoniyati ekanligini e'tirof etdi. “Pandemiya sharoitiga qaramay bugun mehmonlarning kelganidan mamnunmiz. Biz shiddat bilan rivojlanib borayotgan hozirgi kunda, kitoblarni targ‘ib etish yo‘llari, ularning kitobxonlar ommasiga kirib borishi va aholi o‘rtasida kitobxonlik madaniyatining shakllanishi borasida amalda bajarilgan ishlar haqida suhbatlashamiz. Kutubxonachilik sohasi hukumat e'tibori markazida turganining yana bir isboti - shahrimizda Adiblar hiyobonining ochilishi, mahsus ko‘krak nishonining ta'sis etilishi hamda bu sohadagi barcha loyihalarga hayrihoxlik bilan qaralishidadir”. O‘zbekiston Respublikasi Vazirlar Mahkamasi Davlat tilini rivojlantirish departamenti mudiri Abdug‘affor Qirgizboev konferensiya anjuman ishtirokchilarini qutladi va O‘zbekistonda kitobxonlikka e'tiborning davlat siyosati darajasiga ko‘tarilganini ta'kidladi. “Hozirda mamlakatimizda 7,5 mln foydalanuvchiga 91 miln kitob fondi xizmat qilib kelayotganligi, kitobxonlik tanlovlari o‘tkazib kelinayotgani o‘sib borayotgan kitobxonlar sonidan dalolatdir. Bu sohada xizmat qilayotgan fidoiylarning mehnatini munosib taqdirlash maqsadida “Axborot-kutubxona a'lochisi” ko‘krak nishoni ta'sis etilishi ham buning isbotidir”, - dedi A.Qirgizboev, kutubxona jamoasini va faxriylarini, sohaning barcha mutaxassislarini Alisher Navoiy nomidagi O‘zbekiston Milliy kutubxonasining 150 yilligi bilan qutladi, barchaga bayramona kayfiyat va forum ishiga muvaffaqiyat tiladi. 

Ajuman ochilishida Belarus' Milliy kutubxonasi Bosh direktori Roman Motul'skiy, O‘zbekiston Respublikasi Oliy Majlisi Senatning Yoshlar, madaniyat va sport masalalari qo‘mitasi raisi o‘rinbosari Diloram Tashmuxamedova, Rossiya davlat kutubxonasi Bosh direktori Vadim Duda, Qozog‘iston Respublikasi Milliy kutubxonasi direktori Bakitjamal Ospanova (online), M.I.Rudomino nomidagi Rossiya davlat Davlat chet el adabiyoti kutubxonasi Bosh direktori Pavel Kuz'min (online), yozuvchi Vera Mir, O‘zbekiston Respublikasi “O‘zarxiv” agentligi direktori Ulug'bek Yusupov va O‘zbekiston Davlat san'at va madaniyat instituti rektori Ibrohim Yo‘ldoshevlar so‘zga chiqib anjumandan kutilayotgan natijalar, uning doirasida o‘z yechimini kutayotgan muammolar barham topishiga va hamkorlik davom etishiga tilak bildirdilar. 

Onlayn va oflayn tarzda bo‘lib o‘tgan tadbirda ZOOM platformasi orqali 100 ga yaqin axborot-kutubxona muassasalari ham ishtirok etdilar.