“INFOLIB - UZBEKISTAN-2019” VIII Milliy Axborot-kutubxona haftaligi o‘z ishini boshladi

28 oktyabr kuni O‘zbekiston Milliy kutubxonasida  an'anaviy “INFOLIB - UZBEKISTAN-2019”  VIII Milliy Axborot-kutubxona haftaligining tantanali ochilish marosimi bo`lib o`tdi. Tadbirda Haftalik mehmonlari, ishtirokchilari, tashkilotchilari va kutubxona foydalanuvchilari ishtirok etdilar.

Haftalik Prezidentimiz tomonidan ilgari surilgan 5 ta muhim  tashabbusdan biri - yoshlar ma'naviyatini yuksaltirish, ular o‘rtasida kitobxonlikni keng targ‘ib qilish maqsadida hamda O‘zbekiston Respublikasi Vazirlar Mahkamasining 2019 yil 25 fevraldagi 133-f-son farmoyishi asosida o‘tkazilmoqda. 

Tadbirning ochilish marosimida Axborot va ommaviy kommunikatsiyalar agentligi direktori o‘rinbosari G‘.Bozorov, O‘zbekiston Yozuvchilar uyushmasi raisi, O‘zbekiston xalq shoiri Sirojiddin Sayyid, Respublika ma'naviyat va ma'rifat markazi direktori M.Xodjimatov, Yuneskoning O‘zbekistondagi vakolatxonasi vakili F.Pashayev, O‘zbekiston Milliy kutubxonasi direktori U.Teshabayevalar so‘zga chiqdi va ishtirokchilarni tabrikladi. Ular tadbir ishtirokchilarini Milliy Axborot-kutubxona haftaligi o‘z ishini boshlagani bilan qutlab, mamlakatimizda kitob mutolaasi va kitobxonlik madaniyatini oshirish, ayniqsa, yoshlarimizning kitobga bo‘lgan ehtiyojlarini ta'minlash davlat siyosatining ustuvor yo‘nalishlaridan biri ekanligini alohida qayd etdilar.